ماريونيت

 كانوا واقفين لوحديهم في وسط الزرع والخضرة، قرب منها ومسك إيدها وقلها "أنت الدنيا وكل ما فيها"، تعالي معايا نبدأ مشوارنا، نهرب من كل همومنا وأوجعنا، تعالي نحاول نحب الدنيا، نبدأ صفحة ونقفل تانية، تعالي نهرب من كل الناس، أنا مش عايز غيرك أنت، أنت الدنيا وكل الناس، بصيت له وجوه عيونها كلام كتير، موافقة ولا رافضة ده مش هيفرق كتير، بصيت له بحنية، وفي لحظة هي كمان كانت هتنسي الدنيا، كان نفسها تعيش وياه، بس الحلم مبيكملش، رجعت لبعيد والدمعة مكتومة في عينها، وقلتله أنت نسيت احنا أيه، إحنا عرايس علي مسرح، الاحبال هي اللي بتحركنا، إحنا مجرد منظر، ملناش روح تقدر تعبر، لو صرخنا وقلنا كفاية، عمر محد هيسمع صوتنا، احنا مجرد حاجه بتبسط كل الناس، لكن احنا عمر محد فكر فينا، جايز قدرنا أننا نبقي عرايس ماريونيت، تتحرك بحبال علي المسرح، مش أكتر